تجربتي مع اختبار الحساسية المتأخرة 🤧

السلام عليكم ورحمة الله

مرحبا وأهلا وسهلا، اليوم اتخذت قرار اني أبدأ اكتب بالعامي نظرا لأشياء كثيرة ولأني تغيرت وصرت أحس الفصحى ثقيلة علي

حتى هذي التدوينة قاعدة أكتبها بسبب ضغط من الأهل والأصدقاء انه دايم عندك معلومات وأفكار حرام توصل للناس القريبين منك بس القيها على العلن خلي الناس المهتمة توصل لك.

عموما انا جيت اليوم أبغى اتكلم عن مشكلة صحية عويصة أحس كل أحد يعاني منها لكن الاختلاف انه مب كل شخص يدرك ذلك، هذي المشكلة اعتقد انها نتيجة العيش في القرن الواحد والعشرين ولن أتبحر بالأسباب لأنه يتهيأ لي ان كلامي كثير وطويل فما يحتاج ازوده زيادة

الموضوع هو الحساسية المتأخرة للطعام أو التحسس أو ما أعرف وش اسميه بكل صراحة بس بداية خل أشرح الموضوع بشكل علمي وكيف انها تختلف عن الحساسية الشائعة اللي معروفة عند أغلب الناس.

حساسية الأجسام المضادة IgE التقليدية للغذاء

تعرف الحساسية من النوع (1) بإنتاج الجهاز المناعي أجسام مضادة معينة من النوع IgE مما يؤدي الى الحساسية الفورية. تظهر الأعراض خلال بضع ثوان الى عدة دقائق مثل: التورم الشديد، صعوبة التنفس، الطفح جلدي، الحكة او حتى صدمة فرط الحساسية.

يستطيع المصاب بالحساسية من النوع (1) فى الغالب تحديد الطعام المسبب لتلك الحساسية كون أعراضها تظهر فى الحال. ولذلك ليس من الضروري إجراء فحص للدم للتعرف على هذا النوع من الحساسية. تجرى اختبارات حساسية الأجسام المضادة IgE للغذاء بشكل اساسي للتأكد من صحة التشخيص. 

 

حساسية الطعام المتأخرة IgG

تعرف حساسيات الغذاء من النوع (3) بإنتاج الجهاز المناعي أجساماً مضادة معينة من النوع IgG مما يؤدي الى حدوث التهابات. تبدأ الأعراض بالظهور بعد ثلاثة أيام من تناول الطعام المثير للحساسية.

يصعب تحديد الطعام المتسبب فى الحساسية بسبب الظهور المتأخر للأعراض. يستخدم اختبار الأجسام المضادة IgG للمساعدة فى حصر الأطعمة المشكوك بكونها سبباً فى حدوث الحساسية.

هذي مقتطفات تتكلم عن الفرق بين حساسية الطعام المعروفة والحساسية المتأخرة اخذتها من موقع احد الشركات اللي تسوي تحليل الحساسية المتأخرة اسمها اميوبرو. بس خلوني اوضح ان اعراض الحساسية المتأخرة قد تظهر بعد نص ساعة من تناول الطعام إلى ثلاث ايام وهم ما وضحوا هالشيء

الفرق من ناحية التحليل ان الأجسام المضادة اللي في الدم تختلف أنا اليوم بتكلم عن تحليل الحساسية المتأخرة اللي الأجسام المضادة المسؤلة عن ردة الفعل التحسسية هي الـ IgG

أول شيء خل أقول لكم عن الأعراض اللي ممكن تكون عندكم ” التهابات الجلد، إكزيما، حب الشباب أو حبوب في الجسم، إمساك، إسهال، انتفاخ، متلازمة تهيج الأمعاء (القولون العصبي)، الصداع سواء نصفي أو عادي، سمنة أو ثبات في الوزن، ارهاق عام، تشتت في التركيز أو foggy brain، آلام مفاصل، احتباس المياه بالجسم”.

عشان أكون صريحة معكم الأعراض كثييييرة مرة وكل مصدر ممكن يزيد أكثر وأكثر فممكن تبحثون عن هذا الشيء أكثر بأنفسكم،عموما خل انقل لكم تجربتي الشخصية انا عندي أعراض كثير تروح وتجي وتتبدل ومع كل مرحلة عمرية تروح اعراض بس يجي غيرها. بداية مع هبة الناس مع الانظمة الغذائية النباتية قررت اجرب اكون plant based اكثر، ما كنت فيجيتيريان ولا فيقن بس تجنبت المنتجات الحيوانية كثير مرة مرة. كنت اسمع لناس وكيف تأثير المنتجات هذي على اجسامنا ومن هذا الكلام وتشبعت فبه انا كان عندي سيلان في الانف تجي أيام اصير كأني مزكومة منديلي معي دايما ووصلت مراحل اني ما اتنفس براحة قبل ما انام وعذرا على الشفافية الزايدة عن اللزوم بس ما ابغى اغبي او الطف شيء لان الشعور كان يضايق كثير، يوم صرت اتغذى على منتجات نباتية أغلب الوقت ارتحت كثير من هذي المشكلة وحتى كان يجيني انتفاخ بالبطن واسهال كل ما شربت حليب فمن تركت المنتجات الحيوانية بطني ارتاح كثيير وجهازي التنفسي صار احسن وصرت اتنفس أفضل ومعد استخدم مناديل.

بس بالوقت نفسه صرت هزيلة جدا جدا جدا وزني هبط كثير وانا اصلا underwieght من قبل ما انحف، صار عندي خمول وقلة طاقة اكثر واكثر فمع الوقت تراجعت وصرت آكل طبيعي بس غيرت الحليب حقي وصرت اشتري حليب خال من اللاكتوز. ارتحت من الم البطن والاسهال والمغص بس ما زلت استهلك منتجات البان ورجعت لي ازمة جهازي التنفسي.

أيضا عندي مشكلة حب شباب مب مشكلة عويصة ولا الحبوب مملية وجهي بس كثير تجيني ومن تروح حبة وأبدأ اتخلص منها ومن اثرها تطلع لي غيرها وجربت مراهم وكريمات موضعية كثير قد تفيد وتصفي وجهي بشكل خيالي بس في نهاية المطاف وانا استخدمها ومعذبة حالي كثير تطلع لي حبوب فجأة فأقرر اترك كل شيء لاني لا انا اللي ارتحت ولا انا اللي افتكيك من الحبوب. كثير ناس قالوا لي خوذي روكوتان وزنوا علي وكنت افكر كثير بس ادري من جواتي ان حبوبي مب لدرجة آخذ روكوتان بس الناس تزن عشان وجهي له فترة ما كان صافي تماما ولا حبوبي خفيفة جدا ومشكلتها انها ما تنقطع بس.

مؤخرا صار يجيني صداع بشكل متكرر وصداع نصفي قبل الدورة بعض الأحيان. غير كذا اكتشفت اني كان عندي خمول وانا ما ادري كثير احيان آكل وبعد الأكل بساعتين تقريبا أحس بحاجة ملحة للنوم وهذي صارت بصمة شخصية خاصة فيني النوم بعد الأكل من الاجهاد وبعدها اقوم أكمل يومي طبيعي.

عندي ايضا أعراض هضمية من انتفاخات وامساك واسهال بس مب مستمرة عندي تجي فترات وتروح وبعض الأكل رابطته ببعض الأعراض. عندي عرضين غريبات مرة ما قد قابلت احد عنده زيي احيانا اذا اكلت اكل تجيني حكة بخشمي وتجيني اكثر اذا كان الاكل من برا بعد احيانا يجيني عطاس من الأكل 😂

كل هذي الأعراض كنت احسبها طبيعية ان كل شخص يمر فيها ومب مشكلة صحية ممكن تتعالج لان مين ما يصدع؟ مين ما يجيه مشاكل هضمية؟ مين ما يجيه حب شباب؟ وووو على الرغم من ان حب الشباب عندي أكثر من غيري بس لسى اقول ما ويوصل للمراحل الشديدة.

عموما من فترة اكتشفت تحليل الحساسية المتأخرة وقعدت ابحث عنه وشفت مقاطع كثير باليوتيوب وكل ما ابحث ايقن انه فيني اكثر بالنهاية قررت اتخذ خطوة إلى الأمام وحجزت موعد عند دكتورة نجوى الصاوي بمستشفى الحبيب، رحت للموعد وتكلمت للدكتورة عن اعراضي وعطتني هذي الورقة قالت اشري لي على اعراضك وأشرت عليها زي ما تشوفون

كتبت لي التحليل ونزلت حللت وقالوا المفروض تطلع النتائج بعد ١٤ يوم ان شاء الله، حاليا عندي اشياء معينة احس انها تسبب لي الأعراض قاعدة احاول اتجنبها قد ما اقدر اللي هي منتجات الألبان والبقدونس كلها تسوي لي أعراض واضحة جدا، البقدونس من زمان متجنبته حتى من قبل ما اعرف عن التحليل بس الألبان لي اسبوع متجنبتها على خفيف بصورتها الخام يعني ما اشرب حليب ما آكل جبنة او لبنة او غيره بس لسى مثلا اذا فيه كيكة فيها كريمة بيضاء آكلها واشيل الكريمة منها مع انه يبقى قليل، لسى آكل دارك تشوكلت وفيه نسبة حليب لكن قليلة وهكذا.

بعد ما تطلع النتايج الواحد لازم يتجنب الأكل اللي يسوي له تحسس لمدة ٣ شهور وبعدها ممكن يدخل كل اسبوع عنصر واحد، اذا سبب له اعراض يتركه واذا ما حس بشيء يمكن يرجع ياكله.

كثير اذا التزموا يحسون بنشاط اكثر واعراضهم تتحسن كثير أو تختفي لكن المشكلة بمدى التزام الواحد خصوصا ان الواحد ممكن يلتزم ببيته لكن الجمعة مع الناس ممكن تخلي الالتزام صعب لكن بالنهاية الصحة أولى من كل شيء فالواحد المفروض ما يجامل على حساب صحته وممكن يستغلها فرصة بانه ينشر الوعي بخصوص هذا الموضوع. وبمناسبة ذكر الموضوع مشكلة الواحد اذا اهمل نفسه وقال معليش اهم شيء استانس بالأكل والألم أو الأعراض اتعامل معها بعدين، المشكلة ان الاهمال له آثار على المدى الطويل قد يسبب هذا الاهمال مشاكل في الغدة الدرقية وممكن يسبب امراض مزمنة مب سهلة لكن ما ابغى ادخل بالجانب الطبي كثير ابحثوا تفرجوا على تجارب ناس وكلام اطباء ومختصين.

بالنهاية طلعت من التجربة فهمت ليه ما فيه نظام غذائي مثالي للجميع كثير اغذية صحية ما تناسب بعض الناس مثل وحدة من المختصات تقول انه كان عندي مريضة عندها آلام شديدة بالمفاصل وحللت هذا التحليل لسبب آخر، يوم طلعت النتايج لقت ان عندها تحسس شديد جدا من الكركم وانها هي تشربه كل يوم عشانه معروف انه يخفف الم المفاصل وله خواض مضادة للاتهاب فتركته ومع الوقت راح الم مفاصلها! لذلك الواحد لازم يفهم جسمه هو بالذات ويعرف ايش اللي يناسبه وايش اللي لا كل واحد لازم يبحث بنفسه ويستسقي معلوماته من اهل اختصاص ويكون واعي بحيث ما ينجرف وراء علوم زائفة ومستندة على دراسات غير دقيقة.

بالنهاية اشجع كل شخص يسوي التحليل بدل ما يروح جهدك بين اطباء كثير واحد يعالج صداعك والثاني يعالج بشرتك وما إلى ذلك جربوا تحللون وتشوفون نتائج الالتزام لان بالنهاية الأدوية مجرد تهدي الأعراض ولا تعالج المشكلة من الأساس ومن تجربة شخصية ومن تجارب الأشخاص اللي حولي ما مريت على ولا طبيب كتب هذا التحليل لمريضه يمكن اطباء التخصصات الثانية ما يخطر على بالهم او ما عندهم علم ان التحليل صار موجود بالسعودية او ما ادري ايش السبب بالضبط لكن تأكدوا اذا بتسألون عنه قولوا اختبار الحساسية المتأخرة حق الـIgG مرة مهمة كلمة IgG عشان يميزونه عن الحساسية العادية.

بالأخير شكرا لحسن قراءتكم ان شاء الله ناوية اشارككم نتايجي بعد ٣ شهور ان شاء الله ويارب اقدر التزم بنسبة عالية، اذا لامسكم الموضوع شاركوا التدوينة مع الناس اللي تحسون بيستفيدون منها أو تكلموا وناقشوا الموضوع مع الأشخاص القريبين منكم.

اذا عندكم اسئلة ممكن تكتبونها بالتعليقات تحت ممكن نخليها مساحة باننا نشارك تجارب وافكار.

شكرا جزيلا وإلى اللقاء ♥