تجربتي مع اختبار الحساسية المتأخرة 🤧

السلام عليكم ورحمة الله

مرحبا وأهلا وسهلا، اليوم اتخذت قرار اني أبدأ اكتب بالعامي نظرا لأشياء كثيرة ولأني تغيرت وصرت أحس الفصحى ثقيلة علي

حتى هذي التدوينة قاعدة أكتبها بسبب ضغط من الأهل والأصدقاء انه دايم عندك معلومات وأفكار حرام توصل للناس القريبين منك بس القيها على العلن خلي الناس المهتمة توصل لك.

عموما انا جيت اليوم أبغى اتكلم عن مشكلة صحية عويصة أحس كل أحد يعاني منها لكن الاختلاف انه مب كل شخص يدرك ذلك، هذي المشكلة اعتقد انها نتيجة العيش في القرن الواحد والعشرين ولن أتبحر بالأسباب لأنه يتهيأ لي ان كلامي كثير وطويل فما يحتاج ازوده زيادة

الموضوع هو الحساسية المتأخرة للطعام أو التحسس أو ما أعرف وش اسميه بكل صراحة بس بداية خل أشرح الموضوع بشكل علمي وكيف انها تختلف عن الحساسية الشائعة اللي معروفة عند أغلب الناس.

هذي مقتطفات تتكلم عن الفرق بين حساسية الطعام المعروفة والحساسية المتأخرة اخذتها من موقع احد الشركات اللي تسوي تحليل الحساسية المتأخرة اسمها اميوبرو. بس خلوني اوضح ان اعراض الحساسية المتأخرة قد تظهر بعد نص ساعة من تناول الطعام إلى ثلاث ايام وهم ما وضحوا هالشيء

الفرق من ناحية التحليل ان الأجسام المضادة اللي في الدم تختلف أنا اليوم بتكلم عن تحليل الحساسية المتأخرة اللي الأجسام المضادة المسؤلة عن ردة الفعل التحسسية هي الـ IgG

أول شيء خل أقول لكم عن الأعراض اللي ممكن تكون عندكم ” التهابات الجلد، إكزيما، حب الشباب أو حبوب في الجسم، إمساك، إسهال، انتفاخ، متلازمة تهيج الأمعاء (القولون العصبي)، الصداع سواء نصفي أو عادي، سمنة أو ثبات في الوزن، ارهاق عام، تشتت في التركيز أو foggy brain، آلام مفاصل، احتباس المياه بالجسم”.

عشان أكون صريحة معكم الأعراض كثييييرة مرة وكل مصدر ممكن يزيد أكثر وأكثر فممكن تبحثون عن هذا الشيء أكثر بأنفسكم،عموما خل انقل لكم تجربتي الشخصية انا عندي أعراض كثير تروح وتجي وتتبدل ومع كل مرحلة عمرية تروح اعراض بس يجي غيرها. بداية مع هبة الناس مع الانظمة الغذائية النباتية قررت اجرب اكون plant based اكثر، ما كنت فيجيتيريان ولا فيقن بس تجنبت المنتجات الحيوانية كثير مرة مرة. كنت اسمع لناس وكيف تأثير المنتجات هذي على اجسامنا ومن هذا الكلام وتشبعت فبه انا كان عندي سيلان في الانف تجي أيام اصير كأني مزكومة منديلي معي دايما ووصلت مراحل اني ما اتنفس براحة قبل ما انام وعذرا على الشفافية الزايدة عن اللزوم بس ما ابغى اغبي او الطف شيء لان الشعور كان يضايق كثير، يوم صرت اتغذى على منتجات نباتية أغلب الوقت ارتحت كثير من هذي المشكلة وحتى كان يجيني انتفاخ بالبطن واسهال كل ما شربت حليب فمن تركت المنتجات الحيوانية بطني ارتاح كثيير وجهازي التنفسي صار احسن وصرت اتنفس أفضل ومعد استخدم مناديل.

بس بالوقت نفسه صرت هزيلة جدا جدا جدا وزني هبط كثير وانا اصلا underwieght من قبل ما انحف، صار عندي خمول وقلة طاقة اكثر واكثر فمع الوقت تراجعت وصرت آكل طبيعي بس غيرت الحليب حقي وصرت اشتري حليب خال من اللاكتوز. ارتحت من الم البطن والاسهال والمغص بس ما زلت استهلك منتجات البان ورجعت لي ازمة جهازي التنفسي.

أيضا عندي مشكلة حب شباب مب مشكلة عويصة ولا الحبوب مملية وجهي بس كثير تجيني ومن تروح حبة وأبدأ اتخلص منها ومن اثرها تطلع لي غيرها وجربت مراهم وكريمات موضعية كثير قد تفيد وتصفي وجهي بشكل خيالي بس في نهاية المطاف وانا استخدمها ومعذبة حالي كثير تطلع لي حبوب فجأة فأقرر اترك كل شيء لاني لا انا اللي ارتحت ولا انا اللي افتكيك من الحبوب. كثير ناس قالوا لي خوذي روكوتان وزنوا علي وكنت افكر كثير بس ادري من جواتي ان حبوبي مب لدرجة آخذ روكوتان بس الناس تزن عشان وجهي له فترة ما كان صافي تماما ولا حبوبي خفيفة جدا ومشكلتها انها ما تنقطع بس.

مؤخرا صار يجيني صداع بشكل متكرر وصداع نصفي قبل الدورة بعض الأحيان. غير كذا اكتشفت اني كان عندي خمول وانا ما ادري كثير احيان آكل وبعد الأكل بساعتين تقريبا أحس بحاجة ملحة للنوم وهذي صارت بصمة شخصية خاصة فيني النوم بعد الأكل من الاجهاد وبعدها اقوم أكمل يومي طبيعي.

عندي ايضا أعراض هضمية من انتفاخات وامساك واسهال بس مب مستمرة عندي تجي فترات وتروح وبعض الأكل رابطته ببعض الأعراض. عندي عرضين غريبات مرة ما قد قابلت احد عنده زيي احيانا اذا اكلت اكل تجيني حكة بخشمي وتجيني اكثر اذا كان الاكل من برا بعد احيانا يجيني عطاس من الأكل 😂

كل هذي الأعراض كنت احسبها طبيعية ان كل شخص يمر فيها ومب مشكلة صحية ممكن تتعالج لان مين ما يصدع؟ مين ما يجيه مشاكل هضمية؟ مين ما يجيه حب شباب؟ وووو على الرغم من ان حب الشباب عندي أكثر من غيري بس لسى اقول ما ويوصل للمراحل الشديدة.

عموما من فترة اكتشفت تحليل الحساسية المتأخرة وقعدت ابحث عنه وشفت مقاطع كثير باليوتيوب وكل ما ابحث ايقن انه فيني اكثر بالنهاية قررت اتخذ خطوة إلى الأمام وحجزت موعد عند دكتورة نجوى الصاوي بمستشفى الحبيب، رحت للموعد وتكلمت للدكتورة عن اعراضي وعطتني هذي الورقة قالت اشري لي على اعراضك وأشرت عليها زي ما تشوفون

IMG_5035.jpeg

كتبت لي التحليل ونزلت حللت وقالوا المفروض تطلع النتائج بعد ١٤ يوم ان شاء الله، حاليا عندي اشياء معينة احس انها تسبب لي الأعراض قاعدة احاول اتجنبها قد ما اقدر اللي هي منتجات الألبان والبقدونس كلها تسوي لي أعراض واضحة جدا، البقدونس من زمان متجنبته حتى من قبل ما اعرف عن التحليل بس الألبان لي اسبوع متجنبتها على خفيف بصورتها الخام يعني ما اشرب حليب ما آكل جبنة او لبنة او غيره بس لسى مثلا اذا فيه كيكة فيها كريمة بيضاء آكلها واشيل الكريمة منها مع انه يبقى قليل، لسى آكل دارك تشوكلت وفيه نسبة حليب لكن قليلة وهكذا.

بعد ما تطلع النتايج الواحد لازم يتجنب الأكل اللي يسوي له تحسس لمدة ٣ شهور وبعدها ممكن يدخل كل اسبوع عنصر واحد، اذا سبب له اعراض يتركه واذا ما حس بشيء يمكن يرجع ياكله.

كثير اذا التزموا يحسون بنشاط اكثر واعراضهم تتحسن كثير أو تختفي لكن المشكلة بمدى التزام الواحد خصوصا ان الواحد ممكن يلتزم ببيته لكن الجمعة مع الناس ممكن تخلي الالتزام صعب لكن بالنهاية الصحة أولى من كل شيء فالواحد المفروض ما يجامل على حساب صحته وممكن يستغلها فرصة بانه ينشر الوعي بخصوص هذا الموضوع. وبمناسبة ذكر الموضوع مشكلة الواحد اذا اهمل نفسه وقال معليش اهم شيء استانس بالأكل والألم أو الأعراض اتعامل معها بعدين، المشكلة ان الاهمال له آثار على المدى الطويل قد يسبب هذا الاهمال مشاكل في الغدة الدرقية وممكن يسبب امراض مزمنة مب سهلة لكن ما ابغى ادخل بالجانب الطبي كثير ابحثوا تفرجوا على تجارب ناس وكلام اطباء ومختصين.

بالنهاية طلعت من التجربة فهمت ليه ما فيه نظام غذائي مثالي للجميع كثير اغذية صحية ما تناسب بعض الناس مثل وحدة من المختصات تقول انه كان عندي مريضة عندها آلام شديدة بالمفاصل وحللت هذا التحليل لسبب آخر، يوم طلعت النتايج لقت ان عندها تحسس شديد جدا من الكركم وانها هي تشربه كل يوم عشانه معروف انه يخفف الم المفاصل وله خواض مضادة للاتهاب فتركته ومع الوقت راح الم مفاصلها! لذلك الواحد لازم يفهم جسمه هو بالذات ويعرف ايش اللي يناسبه وايش اللي لا كل واحد لازم يبحث بنفسه ويستسقي معلوماته من اهل اختصاص ويكون واعي بحيث ما ينجرف وراء علوم زائفة ومستندة على دراسات غير دقيقة.

بالنهاية اشجع كل شخص يسوي التحليل بدل ما يروح جهدك بين اطباء كثير واحد يعالج صداعك والثاني يعالج بشرتك وما إلى ذلك جربوا تحللون وتشوفون نتائج الالتزام لان بالنهاية الأدوية مجرد تهدي الأعراض ولا تعالج المشكلة من الأساس ومن تجربة شخصية ومن تجارب الأشخاص اللي حولي ما مريت على ولا طبيب كتب هذا التحليل لمريضه يمكن اطباء التخصصات الثانية ما يخطر على بالهم او ما عندهم علم ان التحليل صار موجود بالسعودية او ما ادري ايش السبب بالضبط لكن تأكدوا اذا بتسألون عنه قولوا اختبار الحساسية المتأخرة حق الـIgG مرة مهمة كلمة IgG عشان يميزونه عن الحساسية العادية.

بالأخير شكرا لحسن قراءتكم ان شاء الله ناوية اشارككم نتايجي بعد ٣ شهور ان شاء الله ويارب اقدر التزم بنسبة عالية، اذا لامسكم الموضوع شاركوا التدوينة مع الناس اللي تحسون بيستفيدون منها أو تكلموا وناقشوا الموضوع مع الأشخاص القريبين منكم.

اذا عندكم اسئلة ممكن تكتبونها بالتعليقات تحت ممكن نخليها مساحة باننا نشارك تجارب وافكار.

شكرا جزيلا وإلى اللقاء ♥

17 Comments

    1. الحمدلله للحين ماشية على النظام وقريب بكمل ثلاث شهور منتظمة عليه لكن اعتقد اني بستمر عليه لفترة اطول لين احس اني تشافيت.. استفدت منه كثير بين لي كيف فيه اكلات كانت تزعجني بس ما كنت منتبهه
      بالنسبة للسعر يختلف من شركة للثانية وحسب الباقة اللي تقررين تختارينها ممكن تكلمين الشركة الموجودة بمدينتك وتسألينهم عن التفاصيل أفضل
      http://www.foodprintarabia.com
      بالنسبة لي انا هذي الشركة اللي كانت موجودة بمستشفاي وممكن تكلمينهم على هذا الرقم على الواتساب +971 54 773 4345

      إعجاب

  1. كنك تتكلمين عني صراحه واعظم شي قريته في بحر الانترنت الي كنت ابحث عنه من سنين
    انا تعبت بقع حمرا وبشره شاحبه مهما شربت من اغذيه صحيه ماينفع ووزن ثابت مايتغير بس الحمدلله وزني عاجبني وحبوب شباب مهما عالجتها ماتتعالج مو بكثره بس برضوه تتعب نفسيا والخشم مايوقف وانتي بكرامه واحيان اصير مثل المريضه صداع وعطاي وخشمي وحكه وماعرف وش السبب
    والله حرفيا تتكلمين عني وقررت اروح للدكتوره واسوي اختبار واعرف نفسي صح
    ربي يجزاك خير ويوفقك ولايوريك مكروه يارب

    إعجاب

    1. آمييين يارب وإياك سعيدة بتعليقك لأن هدفي من كتابة هذه التدوينة هي مساعدة الناس اللي يعانون امثالي

      اتمنى انك ترتاحين وتتحسن حالتك كثير، شكرا اسعدتيني بتعليقك

      إعجاب

  2. بسألك حبيبتي تتوقعين بعد ماعرف السبب واتجنب الاغذيه الي تهيج الحساسيه راح تتحسن بشرتي والجلد؟ وراح يخف كل شي!! صراحه عندي استعداد اترك حتى الاكل في المناسبات وابحث عن الشي الي يريح جسمي والله صرت اتفشل من الشحوب والبقع الحمرا وكثير يقولون وش هذا ومن سنين هالشي وماخليت دكتور مارحت له وكلهم يعطوني كريمات ماتسوي شي

    إعجاب

    1. والله شوفي حسب سبب اعراضك لكن اعتقد انها حتى لو ما اختفت تماما بتتحسن كثير

      لان الموضوع بعد يبغاله بحث عميق وممكن تكون سبب اعراضك تحسس + سبب ثاني مثل نقص معادن او غيره هو كل اللي عليك تبدأين خطوة خطوة وبإذن الله بتتحسن حالتك للأفضل

      ما ابغى اعطي انطباع انه حل سحري لكنه حل مجدي ويحسن كثير وطالما انك تركزين على التغذية الجيدة بتلقين نتيجة ان شاء الله

      إعجاب

  3. السلام عليكم. كيفك منور
    انا عندي مشاكل صحيه مختلفه ومتنقله في الجسم وكتير تزعجني وتعبت وانا اروح من دكتور لدكتور علشان كده انتظر نتائج تجربتك علشان اتشجع كيفك دحين وهل اختفت الاعراض. انتظر ردك. وجزاك الله خيرا.

    إعجاب

    1. وعليكم السلام ورحمة الله وبركاته الحمدلله بخير

      بالنسبة للأعراض خفت بنسبة كبيرة وحاليا احاول اكون اغلب وقتي متبعة الحمية لكن مرات آكل بعض الاطعمة لسبب أو لآخر بكميات بسيطة

      مرات تجيني اعراض ومرات لا لكن الأهم اني عرفت كيف اتعامل معها واذا جت تكون اخف جدا من السابق لاني معظم الوقت ملتزمة ولله الحمد واعرف كيف اسيطر على الاعراض

      بالتوفيق واتمنى لك الشفاء العاجل

      إعجاب

  4. السلام عليكم، الله يجزاك خير عزيزتي على طرحك المفصل لموضوع نادراً ما نلاقي أحد يذكره أو يتطرق ليه وخصوصاً عن تجربة واقعية وشخصية..

    أنا صار لي سنين أعطس بعد الأكل وخصوصاً الأكلات اللي احبها واستمتع فيها أحيانا يكون من طباخ الوالدة الله يحفظها أو آكلات من برا بس أكون فعلاً مستمتعه فيها.. وبعدها تجيني عطسات متواصلة ممكن توصل ل١٠ عطسات ورا بعض.. المهم صرنا نسميها أنا وأهلي عطسة الشبع 😂
    (كنت اتوقع إني الوحيدة في العالم اللي تعطس بعد الأكل)🙂

    وقبل كم سنة طرأ علي موضوع حساسية الجلوتين ورحت استشرت دكتور وسألني كم سؤال وعملت تحليل بس ما اعرف إيش نوعه بالضبط.. وما طلع معاه أي نتيجة للحساسية احتمال انه عمل لي فحص لحساسية الجلوتين وبس.. ما اعرف صراحة!!
    المهم الحين بإذن الله اعمل فحص ال IgG وبإذن الله اوصل لحلول صحية ومريحة..
    شكراً لك 🌹

    إعجاب

    1. وعليكم السلام ورحمة الله وبركاته
      فعلا أنا عانيت كثير وما لقيت تجارب مفصلة لا بالعربي ولا بالانقليزي لذلك قررت أشارك تجربتي الخاصة
      بإذن الله، أتمنى لك دوام الصحة والعافية وشكرا على تعليقك أسعدني كثير

      إعجاب

  5. السلام عليكم ورحمة الله؛
    استاذه منّور لي فتره اكثر من شهرين ابحث عن موضوع يجاوب على اسئلتي عن حساسية الطعام وللاسف الشديد ماحصلت ، كل اللي اسمعه ان ماله علاج وابتعدوا عن الاكل اللي تتحسون منه!
    لكن مقالك كثيييييييير كثير أفادني وياليت لو تشاركين اي شي يخص هذا المجال لأنك ماشاءالله مبدعه..
    لي ٤ سنوات دائماً معدتي ضاربه واي شي اكله مااستفيد منه.. نحفت ووجهي شاحب وصار عندي فقر دم حاد ونقص فيتامينات وكل مارحت لمستشفى قالوا قولون عصبي او هضمي… قبل سنتين رحت لدكتور اشتكي من قلب وشوي وابكي سوى لي تحاليل وقال عندك التهاب قولون تقرحي! وعطاني حبوب بنتاسا! لما بحثت عن هذا المرض طلع ماعندي اعراضه فقط عندي اسهال مزمن ! ماكان بالتحاليل دم خفي وكثير اعراض ماهي عندي الحمدلله.. المهم رميت الحبوب وحسيت انه ماعنده علم اكيد عن اللي عندي.. لان التهاب القولون التقرحي مايتحدد الا بالمنظار وهو ماطلب مني !
    المهم كملت سنتين بعدها وريحت نفسي من المستشفيات لاني حسيت مايفهمون اللي عندي وعادي عندهم يعطوني علاج غلط!
    بس للاسف الفتره الاخيره تعبت جسدياً زياده وحسيت خلاص مااقدر اتحمل وارجع اسوي تحاليل والحمدلله باشراف دكتور فااااهم ومتأني الله يسعده دنيا واخره قلت له كل اللي صار لي قال انتي ماعندك التهاب قولون تقرحي والمشكله ماهي قولون ،، انتي مشكلتك حساسية لبعض الاطعمه!
    لما قال لي حسيت اني ارتحت لكلامه وقلت ممكن لاني كل مااكلت معكرونه اتعب قوه قال لانها قمح..
    قاطعت كل منتجات القمح والحمدلله تحسنت كثير وتغيرت نفسيتي وحبيت نفسي ،،
    لكن الى الآن ترجع لي اعراض الحساسيه بدون مااعرف ايش الاكل بالضبط اللي اثر علي..
    بسوي مثل التحليل اللي سويتيه باذن الله..
    لكن اكثر شي فقدته الحليب لان الكالسيوم بدا ينزل عندي وضعف جسمي ومااحب اخذ مكملات كالسيوم اخاف منها..
    وفقدت المخبوزات بقوووه لاني احبها والمعكرونه لسى ماجربت قلوتين فري
    الله يعوضنا خير ويكتب لنا الاجر والعافيه يارب ❤️
    صراحه لقيت مقالك من بحثي بقوقل وفرحت كثير لاني داخله ابحث متضايقه من اعراض رجعت لي ..
    الحمدلله على كل حال ..
    اهم شي نحتسب الاجر ..
    اسفه ممكن اني طولت بالرد لكن لعل احد يقرأ كلامي ويستفيد …
    وشكراً جزيلاً لقلمك ولابداعك وننتظر المزيد 🍃

    Liked by 1 person

    1. وعليكم السلام ورحمة الله وبركاته
      أولا سلامتك ما تشوفين شر وأتمنى انك أفضل الآن
      ثانيا شكرا ردك كثير أعطى لتجربتي قيمة وان شاء الله قريب بشارك تجربتي بتغيير الأكل بما اني كملت سنة على النظام
      بالبداية أكيد بيكون صعب وبتكون مرحلة تجارب صعبة جدا وكثير بيكون فيها اخفاق بس مع الوقت ان شاء الله تفهمين جسمك اكثر وتفهمين طريقة الأكل اللي تناسبه
      بالنسبة للأكلات الخالية من الجلوتين ففيه خيارات كثير حاليا والجميل في الموضوع فيه اهتمام اكثر هذه الأيام بالموضوع وبما انها ممكن تصبح اسلوب حياة فحلو تعرفين الخيارات المتوفرة الأرخص ثمنا عشان ما يصبح العبء اكبر
      لذلك أبغى اشير لشركة المطاحن الثانية عندهم مكرونة ودقيق خاليات من الجلوتين وأسعارها معقولة وجربت السباقيتي من عندهم كانت جيدة فحلو نحن المستهلكين نشجع مثل هذه الشركات عشان نلقى خيارات أفضل وأكثر
      وبالنسبة للمخبوزات ففيه مخابز مثل خالي من الجلوتين إذا كنتي بمنطقة الرياض لكن ممكن تعملينها بنفسك وأفضل مرجع في الموضوع أم أوس تشارك وصفات لكل ما يخطر على بالك
      أتمنى ان حالتك تتحسن تدريجيا وتذكري ان الموضوع ياخذ وقت طويل ولازم تعطين نفسك وقت لاسترجاع صحتك
      مرة ثانية شكرا لردك وأتمنى للجميع دوام الصحة والعافية

      إعجاب

اترك رداً على ليلى إلغاء الرد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s