علاقتي مع الأكل سبب اجرائي لاختبار الحساسية المتأخرة

مرحبا، بهذي التدوينة بتكلم لكم عن علاقتي مع الأكل عشان ممكن احد منكم يحس بارتباط او ممكن تفتح له اشياء ويفهم فترات من حياته وصحته.

اولا انا كبرت كطفلة نقاقة بشكل كبير بالأكل مزاجي كان صعب جدا واغلب خواتي زيي ببيتنا كان كل احد عنده مجموعة من الاكلات اللي ما يتقبلها ولا يبلعها لدرجة اعتقد ان امي تعبت مننا وصارت ما تجبرنا على الاكل وتقول كيفكم “من أكل على ضرسه نفع نفسه”

انا كبرت اكره الحليب بشكل كبير مستحيل اشربه خالتي كانت ترغبنا فيه وتحط لنا نسكافيه او كاكو او عسل او اللي تبغون بس عشان نفطر عليه وانا من اشرب رشفة يجيني غثيان وممكن استفرغه من كثر ما اني ما احبه، عندي ذكريات كثير مع الحليب فيه فترة كانت امي تحط لنا اياه على الفطور اجباري وكل اخواني يشربونه واللي يشرب حليبه له مكافأة انه يروح للمستودع ياخذ بساكيت كسناك للمدرسة.

كانوا اخواني كلهم يشربونه ويطلعون كلهم ياخذون بساكيت وانا استغل فترة خروجهم باني اصبصب الحليب اللي بكاسي بين كاساتهم عشان يعتقدون اني شربت كاسي وكل احد مبقي شوي من كاسه. عندي ذكرى بنفس هذي الفترة اني آخذ ساندوتشتي وارميها تحت الكنب لاني عجزت آكلها عاد ما اتذكر وش كانت محشية نفسي اعرف.

الذكرى الثانية كنت بمرحلة اكبر وكانوا اخواني كلهم يحبون يفطرون كورنفكلس وانا استغرب وما احبه قد ما يحبونه بس اتقبله وما اتقبل الحليب ففيه فترة كنت افطر زيهم كورنفلكس واذا خلص اروح بالخفاء اصب الحليب كله بالمغسلة بعد صراع مع نفسي ومحاولة شربه، كان يجيب لي غثيان! يوم كبرت اكثر جربت آكل كورنفلكس مع زبادي وفواكه وتهت كثير عشان اتقبل آكله 😂.

اعتقد اني وانا صغيرة كنت اسمع لجسمي وافهمه ما احب هذا الشيء يسبب لي شعور سيء مستحيل آكله لكن فقدت هذا الشيء يوم كبرت. انا مهتمة بالصحة من وانا صغيرة فتعرفون الافكار اللي تربينا عليها من ناحية التغذية فكان ودي اصير صحية واشرب حليب بس جسمي ما يتقبله اعيي اشربه وكم من اكل واكل كبيته بالمغسلة ولا بالارض نثرته وطرق مختلفة بالتحايل على الاشخاص الكبار اللي يجبرونني آكل شيء ما اتقبله وكنت احس بالذنب وادري ان الحركات هذي غلط بس صوت جسمي من جوا اقوى من اي شيء ثاني كنت ارمي الاكل واقول استغفرالله بس ما اجبر نفسي عليه.

من سنة ونص تقريبا كنت غايصة بعالم النباتية واتابع نباتيين متشددين نباتيين صرف ووحدة تاكل منتجات نباتية غير مطبوخة “نية بس ما تاكل اكل مطبوخ” وبفترة متابعتي لهم اقتنعت بمفهوم النباتية لكن ما حولت نباتية بس غيرت نظام اكلي بشكل كبير وصار اغلبه معتمد على الاكل النباتي، قطعت الالبان تماما واللحوم اصلا انا ما آكل لحم من وانا صغيرة بس الدجاج ما كنت اسويه لنفسي بس احيانا اطلع عزيمة واضطر آكل دجاج وهكذا. ذيك الفترة ارتحت كثيييييير خصوصا من ناحية الجهاز التنفسي احسه صار نقي ما فيه اغشية مخاطية صرت اتنفس احسن اعراض دورتي تحسنت وبطني ما عاد يعورني زي دايم بس بنفس الوقت صرت هزيييلة! ما فيني طاقة ضعفت لدرجة ما قد وصلتها خسرت ٥-٧ كيلو.

بعد فترة قررت اسجل بالنادي ومع النادي تركت اللايف ستايل النباتي وصرت استهلك منتجات حيوانية اكثر كنت آكل دجاج ووقتها استوعبت ان الدجاج ما كان سيء تجاه جسدي بس بعد رجعت للالبان عشان ازود استهلاكي للبروتين صرت اشرب بروتين شيك “whey protien” وآكل بروتين بار واشرب حليب اكثر. فترة النادي كانت أسوأ فترة قد عشتها لبشرتي كان عندي حبوب فضيعة مستمرة وحمراء ووجهي كان يعور وتحسونه ملتهب وبذيك الفترة حصلت اكثر تعليقات من الناس على بشرتي، انا بشرتي تطلع حبوب بس حبة حبتين بالكثير فما احد يعلق غالبا بس ذيك الفترة حتى ناس مب قريبين مني ابدا وحتى ناس كانوا يزنون علي خوذي روكوتان خوذي روكوتان او يحسبونني آخذ روكوتان وانا كنت افكر فيها بس من جوا ادري ان اساسا بشرتي مب سيئة لدرجة آخذ روكوتان وادري ان وجهي ملتهب لفترة وبيخف ان شاء الله لان عمره ما كان كذا بس ما كنت اعرف وش السبب.

وقت النادي كنت اشرب بروتين شيك كثيير وما كان يعجنبي! كنت اتغصبه لانه كان الطريقة الوحيدة لتغطية احتياجي من البروتين! وشريت اكثر واحد اتقبله وكنت احط معه زبدة فول سوداني واحيانا ايسكريم ومع ذلك ما اتقبله مرت الايام وانا عجزت اتقبله فبطلت آخذه بس كنت آخذ بروتين بارز فيها whey خفت بشرتي وكنت احسب انه بسبب المرهم اللي استخدم مع انها لسى تطلع حبوب بس مب بشدة الفترة السابقة. تركت النادي وخف كثيييير استهلاكي للبروتين بار بس فيه واحد يعجبني لسى آكله بين فترة وفترة يستخدم خليط بروتين صويا و whey.

بحط لكم صور هنا من عينة من تغذيتي اثناء فترة النادي، عندي بعد صور لوجهي بس للأسف ما اقدر احطها ولا كان بيكون مفيد اني احط لكم تغذيتي + شكلي ذيك الفترة لأني كنت احاول آكل “صحي” حسب مفاهيمي وقتها طبعا كنت آكل وجبات عادية لكن هذي كانت الاشياء اللي آكلها بشكل مستمر كوجبة بديلة او سناك يعني هذي مب تغذيتي كلها لكن جزء كبير منها وانا نزلت لكم الأشياء اللي لها علاقة بمنتجات الألبان ولو تلاحظون كنت استخدم الزبادي واللبنة مع ليمون واعشاب كصوص “صحي” ولو تلاحظون الصورة اللي فيها كيسة بروتين فيها منتج لزقات لحبوب الوجه 😂💔💔.

IMG_5240.jpegIMG_5241.jpegIMG_5242.jpegIMG_5243.jpegIMG_5244.JPGIMG_5246.jpegIMG_5247.jpegIMG_5248.jpegIMG_5249.jpeg5F066784-DDAC-4F2B-870C-0580C6DA3688.JPGIMG_5250.jpegIMG_5252.jpegIMG_5253.jpegIMG_5254.jpeg9EC76E2C-A6C4-41B7-9A6C-974F0C00E8DC.JPGIMG_5255.jpegIMG_5256.JPGIMG_5257.jpegIMG_2227.jpeg

كبرت وانا ما كنت آكل كثير من الخضروات بس قررت اجرب السلطات وتصارت عجبني فصرت آكل انواع اكثر من الخصار، اكتشفت عالم السلطات بالثانوي وطحت بالتبولة طيحة فضيعه صديقة امي معروفة بالتبولة وكنت باي عزيمة ادخل اتبلها بس عشان آكل منها وبعد العزيمة عادي جدا اخم البلم وآكل منه مع الايام انتبهت ان التبولة تعور بطني بشكل فضيع من بكره ولا تتهضم زين وبعد كم مرة تأكدت انها فعلا هي وتأكدت انه البقدونس اللي يألم كذا فبكل حزن ودعت التبولة والبقدونس كله.

مرة بعد ما وقفت اكل بقدونس اكلت سلطة فيها بقدونس بدون ما ادري ما كملت ساعتين من اكلتها الا وبطني منتفخ ويألم الم فضيع ما قدرت اتحرك من السرير وقاعدة على الكمادة ما خف الا يمكن بعد اربع ساعات من الاستلقاء.

مع الايام اكتشفت اختبار الحساسية المتأخرة وبحثت عنه وقريت اكثر ووو وقررت اسويه وعرفت ان عندي اعراض كثيرة.

كان فيه فترة من حياتي كان عندي غثيان صباحي مستمر وكنت احسبه بسبب الدراسة لكني ما كنت احس اني مضغوطة هالقد لكن بعد ما قدرت اربطه بنوع معين من الاكل لاني ما اتذكر تغذيتي ذيك الفترة.

دايم يجيني نعاس بوسط اليوم وما اعرف سببه وهالشيء مستمر معي من سنوات، دايم اتصور اذا اجتمعنا مع بنات خالتي نايمة بوسطهم وصارت هذي بصمة شخصية وكنت احسب عشان كلهم يشربون كوفي وانا لا لاني ما احبه بدون سبب وهالشيء محير العالم بما ان اهل مدمنين قهوة كلهم بس حتى انا ما عندي جواب. حتى الحين احيانا تنام عندي بنت خالتي وننام كلنا مع بعض وناكل نفس الاكل وكل شيء لكن احيانا اتعب واروح انام لحالي واحيانا هي تجي تنام زيي بوسط اليوم ومرات قليلة خواتي يحسون بالعب معنا بس أنا نتأكدة ان النومة هذي تجي من انواع معينة من الأكل لكن انا عجزت اعرف وشي.

فيه كثير اشياء ما كنت آكلها وبعضها مستمرة ما آكلها وما عندي سبب غير شعوري باني ما ارغب فيها وكثير تجيني استغرابات انه كيف انت كذا لكن ما عندي جواب احيانا اصل إلى جواب بعد فترة طويلة من الحياة زي عن علاقتي مع الحليب وسبب حبوب وجهي وأحد الأشياء اللي تسبب لي اضطرابات هضمية لكن احيانا تكون عندي اعراض سببها مجهول او اشياء ما احب آكلها بدون سبب عشان كذا اجريت اختبار الحساسية المتأخرة لعله يضع بعض النقط على الحروف ويساعدني في فهم جسدي ونفسي اكثر.

 

1 Comment

  1. السلام عليكم انا جداً مهتم بتجربتك في حساسية الطعام المتاخرة، حاب أفيدك أو أزيدك بمعلومة في الدكتور باسل بوسعيد بالامكان أنه يتمم بعض المعلومات الناقصة.

    https://instagram.com/basel_the_immunologist?igshid=105rf2k9jj6f1

    تمنياتي لك بالتوفيق، ومتابعين لتجربتك استمري.

    إعجاب

اترك رداً على إبراهيم إلغاء الرد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s