نتائج تحليل اختبار الحساسية المتأخرة

الاسبوع الماضي استلمت نتائجي الأشياء الأساسية كانت متوقعة جدا بس بعضها ما كان عندي اي فكرة اني اتحسس منها شوفوا نتايجي، معليش جودة الصور مب الافضل

الأشياء اللي باللون الاحمر هي الأكثر تحسس اللي بالاصفر وسط الأخضر اوكي، والأرقام اللي جوا المربعات الرقم الأعلى يعني أكثر تحسس وهكذا فأنا أكثر شيء يسبب لي تحسس هو الحليب البقري بعدين اللي تحته واللي تحته.

وفيه شيء احبطني صراحة رقم ٢ مكتوب عندي “جيلي” ولو تشوفون بالانقليزي مكتوب agar agar ما كنت منتبههبس يوم لاحظت انا اعرف ان الاجار مادة مستخرجة من الطحالب تعطي قوام جيلي لكن اغلب الجيلاتين الموجود عندنا بقري، رحت سألت الشركة وكان هذا ردهم:

قلت يمكن انا اجهل معلومة معينة ورحت ابحث ما لقيت الكلام هذا وقلت يمكن التركيب متشابه لان فيه بعض الأكلات اذا عندك تحسس منها فيه مجموعة أكلات ممكن تحسسك فقلت ممكن الجيلاتين والأجار نفس الشيء لكن حتى تركيبتهم تختلف والشيء المشترك بينهم هو انهم يعطون قوام مشابه لذلك رفضت اقطعه وكنت ابغاه كبديل للبيض، جربت مرة وسويت خبزة واستبدلت البيض بجيلاتين بقري..

صباح اليوم الثاني افطرت عليها والله بدون مبالغة اني قعدت اعاطس بشكل مستمر بالبداية كنت اقول اكيد الجو فيه شيء اكيد فيه غبار وادور اي تصريفة بس استمر العطاس طول ما انا قاعدة آكل وما كانت كمية كبيرة اقل من شريحة توست وحدة

لين بديت استنتج انه طيب قايلين لي لا تاكلين جيلاتين وانا مب مقتنعة فشكله هو؟ حتى جاني سيلان بالانف وخلاص تركت خبزتي ما كملتها بعدها بوقت جاني خمووول ونمت يمكن ساعة؟ بس والله ما كنت احسب ان النتائج بتبان من البداية حسبت جسمي اذا تعود على الحمية بعدها بيسوي ردة فعل زي كذا اذا اكلت شيء غلط، انا قبل كان يجيني حكه وعطاس بس مب بهذا القد ولا يجيني سيلان مباشر فهمالرة اللي استجد علي هو شدة الاعراض.

عموما كلمت الشركة بالواتساب عشان يسوون لي جدول ما عندي نية التزم فيه بس بشوف وآخذ فكرة بس طلبوا مني صورة نتايجي لكن ما بعد ردوا علي.

قبل بيوم رحت للدانوب على اساس بتقضى بدائل البان لأني عارفة انها بتطلع لي ومنت متيقنة لدرجة اقول حتى لو ما طلعت لي بالنتايج هي اول شيء بقطعه بس اشوى طلعت اكثر شيء يحسسني.

انا مب مرة احب جوز الهند بس يعني حسيت لازم اعطيه فرصة لان المجتمع الفيقن يستخدمه بكثره كنت ناوية آخذ حليب وكريمة ورجعت للبيت اكتشفت ان العلبتين كلهم كريمة واخذت هذي الانواع لاني ما ابغى اجيب احجام كبيرة باسعار اعلى وانا ما اضمن اني بتقبله اصلا، وبخوص الحليب النباتي سبق وجربته فعندي فكرة عن انواعه، اخذت بعد جوز هند مجفف ومبشور لاسباب كثير يسوون منه زبدة “تختلف عن الزيت” وبما اني عندي حساسية كازين ما اقدر آكل زبدة عادية فقلت بجرب اسوي زبدة جوز هند واسوي فيها كوكيز او اي وصفة تتطلب زبدة بقر.

كنت بعد ادور شوكلاته بدون حليب، انا من زمان افضل الدارك بس كنت آكل لندت وفيها حليب فاضطريت اغيرها واخترت هذي الماركة وفيه غيرها كم وحده صراحة ما توقعت القى بهذي السهولة، ميزة هذي الماركة انها ما فيها صويا لان كان عندي شك اني عندي حساسية صويا وبما اني رحت قبل استلم النتايج اخذتها اسلم.

آخر شيء الآيسكريم يحممممس اولا لانه من هذي الماوكة ونكهته مغرية وبعد مصنوع من حليب لوز، يوم رجعت للبيت اخذته وانا فرحااانه بعدين حسيت اني مسوية مصيبة ووشلون اخذته ووثقت فيه اكيد موجود فيه صويا ورجعت قريته وطلع فعلا فيه وقلت معليش على الاقل بسهر عليه الليله قبل استلم النتايج بس يوم جاء الجد عجزت! قلت وشلون آكله مقدر استمتع فيه وانا ادري انه يمكن أعاني منه لأيام فتركته وقلت بعطيه اي احد غيري.

عاد يوم طلعت التحاليل طلع ما عندي مشكلة مع الصويا بس عندي مشاكل مع القمح والبازلاء وكلها موجودة بالآيسكريم فنصيحة لا تتحمسون زيي اصبروا لاحقين على هذي الأشياء.

اكون صريحة معكم انا مهيئة نفسي من قبل لكن انصدمت بالقمح مرررة ما حطيت ببالي انه ممكن يطلع وانا كنت احب خبز لوزين بالحبوب هو بر وفيه حبوب من ضمنها كتان وانا مب مرة على الكتان بس كثير اشياء صحية آكلها تحتوي عليه فاكتشفت اني عايشة على استهلاك المحسسات.

اول يوم بعد التحليل رجعت من الموعد ورحت سوبر ماركت لان اكتشفت مقدر آكل اساسيات رحت لولو هايبر ماركت لان قد رحت له وشفت مخبزهم يسوي انواع توست صويا وانواع كثير فكنت اقول اقلها اضمن الخبز لكن رحت وتحطمت على كثر انواع الخبز الا ان القمح لازم يدخل فيه، لقيت ماركة قلوتن فري وبدون قمح بس غالية جدا وانا ابغى شيء اثبت على انه استهلاك يومي والشيء الثاني اللي ما شجعني اشتريه ان اخوي عنده حساسية ذرة وهم مستخدمينه فقلت بلاش خصوصا البداية ابى اكلنا يصير سوا لانه منصدم ومتحطم وماله بالمجال هذا فضايع ولا يعرف وشلون بياكل فقلت اكون معه بالبداية.

رحنا الاقسام الثانية وكل شوي ننصدم قد ايش مشكلتنا عويصة، قلنا بنجيب مكرونة واتذكر فيه مكرونة شوفان وانواع ثانية مب قمح لكن اكتشفت ان اغلب الماركات العادية الموجودة بكل سوبر ماكت بعد فيها قمح بس موجود مكرونات بدون قمح بس شركات اجنبيه، بالنهاية كذا كان شكل عربيتنا:

مكرونة وتونة وزيت جوز هند وبار شوكلاته بس رحنا جزء الخضار والفريزر وصارت كذا:

طبعا استوعبنا انه معد فيه سمبوسة معد فيه برقر مغطى ببقسماط واختكم في الله ما تاكل لحم ولا سي فود الا ما ندر فشوي شوي تستوعبون الوضع، قعدنا بالسوبر ماركت ساعتين بدون مبالغة نمشي ونقرأ ونترك نمشي ونقرأ ونترك وهذاك اليوم ما اكلت زين الصدق نمت جوعانة.

طلعنا من السوبر ماركت ومرينا قريل ات وقلت باخذ شاوما صحن من عندهم وآكلها بخس واخوي قال بياخذ برقر لانهم يستعملون خبزة بطاطس طلبنا وقلنا بنشوف فرسان اذا عندهم خبز وحنا معتمدين بناخذ خبز بطاطس بس انصدمنا صراحة اول مكون دقيق قمح بعدين حليب بعدين بطاطس حسينا بالخيانة وطلعنا

صورة للعشاء اللي ما شبعني، طبعا وحنا نطلب قعدنا نسأل عن الصوصات طبعا كلها فيها مايونيز فما اكلناها لان عندنا حساسية بيض.

مع اعلان النتائج للاصدقاء المهتمين جتنا نصائح واقراحات احداها هذا المخبز الرائع:

هذا المخبز يسوي خبز من دقيق الرز عنده توست عنده صامولي وبرقر وعنده مناقيش ومنتجات مستوردة، اخذت من عندهم توست طلعوا يستخدمون خليط دقيق رز وذرة واخوي سألهم اذا يقدرون يسسون له بدون ذرة قالوا ايه بس لازم تاخذ الدفعة كاملة اللي هي عبارة عن ٤ اكياس توست فقلنا ايه من بكرة اخذناها وفرزنناها

للامانة توستهم طعمه لذييذ! جدا جدا مقبول وحتى اهلي اللي لسى ما حللوا عجبهم مررة، يومها انا اشتهيت فطايرهم واخذت لي حبة سبانخ كانت لذيذة عادية ما حسيت بالفرق

طبعا الاسعار مب زي الاماكن المعتادة بس قيل لي انه ارخص من السوق المعتاد عموما لقيت عندهم عجينة سمبوسة وفرحت جدا لاني آكلها بالأيام العادية مب بس برمضان بس ما جربتها، مشترياتنا من المخبز:

حاليا أكلي بالبيت سهل جدا عندي التوست افطر عليه احيانا اما باقي الوجبات فنفس اكلي قبل اللهم استثنيت المحسسات، آكل سلطة او صدر دجاج او سلطة كبة او رز او عدس او بطاطا حلوة يعني لسى بعد ما لي كثير بهذا الدايت بس بعد معاناة اول يوم حسيت اني بجوع وبنحف بس الحمدلله احس اني احسن الحين راحت الصدمة، غيرت سناكاتي صرت آكل برتقال مثلا او خيار وجزر او فشار مملح بس او لوز او بذور دوار الشمس.

لسى قاعدة استكشف بالخبز ولسى فيه تجارب بس ما رضيت عنها تماما ان شاء الله بطورها لين تصير حلوة واشارككم اياها.

شايلة هم اكثر شيء الاكل خارج البيت خصوصا بالعزايم ما ادري اذا بلقى اشياء اقدر آكلها او لا بس بحاول اجرب اشياء جديدة واغير من نفسي بعد.

بالنسبة للأعراض فسيلان انفي كان يخف يوم وراء يوم وراح باليوم الرابع تقريبا بعدين اكلت الجيلاتين وجاني سيلان يومها وراح الحمدلله، فيه شعور غريب جدا ما توقعت احس فيه هو اني صرت احس نفسي خفيفة! انا وزني اقل من الوزن الطبيعي بشوي فانا نحيفة وتوقعت هذا الشعور يجي للسمان، بالنسبة لبطني فمن اول يوم الحمدلله تحسن وقضاء الحاجة صار شيء مريح ويتم بسلاسة وراحة الحمدلله، بشرتي صفت كثيييييير الحمدلله ما فيها حبوب طبعا عندي آثار وقاعدة استخدم لها مرهم سكينورين بس لي فترة استخدمه وبشرتي تحسنت معه لكن النتايج اللي حصلتها بعد النظام الجديد لا تقارن.

قبل احلل وصلت مرحلة لعدم الثقة ببشرتي لدرجة ما ابغى اصور بدون مكياج حتى لاقرب الناس لي واذا جاء احد لبيتنا احط كونسيلر ولا يهمني بس اغطي الآثار ولسى تبان بس احس اهم شيء ما تبان الا على خفيف، وما كنت احط اي مكياج على باقي بشرتي تصوروا اني انقط الكونسيلر وبس علاقتي ببشرتي ما كانت حلوة والحين الحمدلله بعد اقل من اسبوع على ان الآثار ما اختفت الا اني احس بشرتي حلووة ورجعت اصور بدون مكياج واليوم عندنا جمعة عائلية طلعت ببشرتي الطبيعية فهذا تحسن كبير من ناحية علاقتي بنفسي وبجسمي ما تتصورون كيف كان مأزمني.

وزني تقريبا نفسه اللهم اقل بكم قرام بس عموما وزني مب ثابت مرة وعندي امل انه مع الوقت بصير اعرف آكل اكثر واسمن شوي ان شاء الله، حتى لو ما سمنت عادي عندي.

اعتقد هذا يكفي لتحديث اول اسبوع بعد استلام النتائج ولا؟ ما ادري وش بنزل بعدها ممكن وصفات ممكن تحديث جديد اذا حسيت انه باقي كلام ابغى اقوله ممكن طرق لاستبدال بعض المكونات لكن اذا عندكم موضوع معين ودكم اتكلم عنه قولوا وانا اذا حسيت اني عندي المعلومات المناسبة بنزل.